.jpg){kind=tracking}
.jpg){kind=tracking}
.jpg){kind=tracking}
સતપંથીઓના 'સોદાગર' : સંસ્કારધામ અને વાંઢાયના મંદિરમાં પીરાણાના સાધુઓ માટે લાલ જાજમ પાથરનાર 'સોદાગરો' કોણ ? મંજૂરીનું તરકટ રચી મોટો ખેલ ખેલાઈ ગયો...
પીરાણાના સાધુઓને સંસ્કારધામ અને વાંઢાયના ઉમિયા માતાજી મંદિરમાં દર્શન માટે મંજૂરી આપવાના ચકચારી પ્રકરણમાં આ વિવાદાસ્પદ નિર્ણય લેવામાં વાંઢાયની બંને સંસ્થાના વડાઓ સાથે કેન્દ્રીય સમાજના પ્રમુખ અબજીભાઈ કાનાણી પણ સામેલ હોવાનું ખૂલતાં સમગ્ર સમાજમાં ખળભળાટ મચી ગયો છે.
દેખીતી રીતે જ આ સમાચારે ભારતભરના સનાતનીઓને વ્યથીત કરી દીધા છે. સમાજની ત્રણે સંસ્થાના હોદ્દેદારો એકબીજામાં કુલડીમાં ગોળ ભાંગે અને સમાજને સનાતનીના પાઠ ભણાવે !!
હવે તો હદ થઈ રહી છે...પ્રજાને મૂર્ખ બનાવવાની પણ એક હદ હોય છે . આપણી સમાજના હોદ્દેદારો તો એ હદ પણ ઓળંગી ગયા છે...
મંજૂરીની વાત જ શંકાસ્પદ અને ષડ્યંત્ર ?
મંજૂરી આપવાની વાત જ શંકાસ્પદ અને ષડ્યંત્ર લાગે છે... મંજૂરી શેની? કોઈ હિન્દુ સંતો કે દર્શનાર્થીને કોઈ મંદિરમાં દર્શન કરવા માટે મંજૂરી માંગવી જરૂરી નથી તો અહીં મંજૂરી માંગવાનું તૂત ઉભું કરવાની જરૂર ક્યાં હતી? મંજૂરીનું તરકટ રચી કેન્દ્રીય સમાજના પ્રમુખને ફસાવવામાં આવ્યા છે...જે કંઈ હોય અબજીભાઈએ તાત્કાલિક ખુલાસો કરવો જોઈએ અને ત્રણે સંસ્થાના વડાઓએ સમગ્ર સનાતની સમાજની જાહેર માફી માંગવી જોઈએ...
પીરાણાના સાધુઓને VVIP નો દરજ્જો કોણે આપ્યો?
મંદિરના ગર્ભગૃહમાં સામાન્ય રીતે દર્શનાર્થીઓ જઈ શકતા નથી...VVIP ને જ પ્રવેશ અપાતો હોય છે. વાંઢાયના કિસ્સામાં શું બન્યું તે અંગે તે સંસ્થાના પ્રમુખશ્રીને ખબર હશે જ...તેઓ જણાવે તો ખબર પડે..
બાકી પીરાણાના સંતોના મંદિર દર્શન અંગે સહમતિ માંગવી કે મંજૂરી આપવી તે વાત જ વિચિત્ર છે અને ખૂબ મોટા ષડયંત્રનો ભાગ છે. એ લોકો એમને એમ દર્શન માટે આવત તો કોઈ અટકાવવાનું નહોતું...તો પછી આ મંજૂરીનું તૂત કેમ ઉભું કર્યું? પીરાણાવાળાને વી.વી.આઈ.પી. નું સ્ટેટસ કોણે આપ્યું? મંદિરના પગારદાર પૂજારીની કોઈ હેસિયત નથી કે તેઓ આવડો મોટો નિર્ણય લે...
હંસરાજભાઈ ધોળુએ શું ખુલાસો કર્યો?
"પિરાણા ના સંતો ઉમિયા માતાજી મંદિર અને લક્ષ્મીનારાયણ મંદિરના દર્શન માટે આવે તે અંગે મંજૂરી આપતા પહેલા કેન્દ્રીય સમાજના પ્રમુખ શ્રી અબજીભાઈ કાનાણી, ટ્રસ્ટી રામજીભાઈ અને મણીભાઈ ભગત સાથે પરામર્શ કરીને ઉમિયા માતાજી ટ્રસ્ટ ના પ્રમુખ શ્રી હંસરાજભાઇ ધોળું અને લક્ષ્મીનારાયણ કેન્દ્રસ્થાનના પ્રમુખ શ્રી ગંગારામ ભાઈ રામાણી અને મહામંત્રી શ્રી રતિલાલ પોકારે સૌ સાથે મળી નિર્ણય કરેલ છે અને મંજૂરી આપેલ છે. જેની નોંધ સમગ્ર જ્ઞાતી એ લેવા વિનંતી."
હંસરાજભાઈના આ સનસનીખેજ ખુલાસા બાદ કેન્દ્રીય સમાજના પ્રમુખ અબજીભાઈએ સમાજના પ્રવક્તા મારફતે આપેલ જવાબ આ રહ્યો...
અબજીભાઈએ શું આપ્યો જવાબ?
"શ્રી ગંગારામભાઈ એ ફોન પર જણાવેલ કે અમો હંસરાજભાઈ, રતિભાઈ, મણીભાઈ સાથે આ અંગે વિચાર વિમર્શ કરેલ છે અને સતપંથીઓ દર્શન કરવા આવે તેમાં તેઓ સહમત છે".
તે અનુસંધાને મેં જણાવેલ કે દર્શનાર્થીની રીતે દર્શન કરવા આવે તેમાં વાંધો નહીં પરંતુ તેઓ ત્યાં આવે ત્યારે તેમને સંસ્થાના જવાબદાર કોઈપણ કાર્યકર્તાએ આવકારવા તેમજ સન્માનવા નહીં. આ વિચારો સાથે ગંગારામભાઈ પણ સંપૂર્ણ સહમત હતા.
તેમ છતાં સતપંથીઓ દર્શને આવ્યા પછી જે ઉમળકાભેર આવકાર આપ્યો તેમજ ભગવાન શ્રી લક્ષ્મીનારાયણના મંદિરના ગર્ભગૃહમાં સુધી પણ લઈ જવાયા તે મંજૂરી વગર થયું જણાય છે. મને વિશ્વાસ છે કે ગંગારામભાઈ, હંસરાજભાઈ, મણીભાઈ કે રતિભાઈ કોઈએ આવી મંજૂરી આપેલ નહિ જ હોય. તેમ છતાં આ બન્યું અને તેમના સ્વાગતનો પ્રચાર પ્રસાર થયો તે સામે જ દેશભરના સનાતનીઓમાં ભારે આક્રોશ અને ખોટા પડઘા પડયા છે.
અબજીભાઈનો ખુલાસો અર્ધદગ્ધ છે !
પ્રમુખશ્રી અબજીભાઈ તેમના ખુલાસામાં હજુ પણ ઘણા બધાને બચાવી રહ્યા છે પણ સમાજ અબૂધ નથી...હંસરાજભાઈનો ખુલાસો ખોટો છે એવું પણ અબજીભાઈએ ક્યાંયે કહ્યું નથી ! આ બધું શું સૂચવે છે? આ એપિસોડમાં બધા જાણી ગયા છે કે ખરેખર શું થયું છે... કેટલાક લોકોનો 'છૂપો' એજન્ડા જાહેર થઈ ગયો છે ત્યારે સનાતની લડાઈમાં નવેસરથી એકડો ઘૂટયા સિવાય આરો નથી...
આવું કંઈ પહેલીવાર થયું નથી !
કેન્દ્રીય સમાજના પ્રમુખ અબજીભાઈએ અને વાંઢાય સંસ્થાના વડાઓએ આવું કંઈ પહેલી વાર નથી કર્યું. અનેક વખત સમાજદ્રોહીઓ અને મવાળ તત્વો સામે સનાતની સમાજના કાંડા કાપી આપ્યા છે. પણ આ વખતે તો હદ કરી નાખી !! પીરાણાના સાધુઓ માટે આટલી હદે વ્હાલ ઉભરાવવાનું કારણ શું?
લોકોને મવાળ અને સતપંથ સામે લડવા કહેવું અને પોતે આ પ્રકારની હીન પ્રવૃત્તિ કરવી તે સમાજના મોવડી મંડળને શોભતું નથી...ભવિષ્યમાં સતપંથ જોડે પણ આ નેતાઓ ગમે તે પ્રકારનું 'સમાધાન' ન કરી જાય તે જોવાની જવાબદારી જાગૃત સનાતનીઓની છે.
હંસરાજભાઈ અને ગંગારામભાઈ હવે મૌન થઈ ગયા છે...
વાંઢાયની આપણી સંસ્થાઓમાં સતપંથીઓને પ્રવેશ આપવા બાબતે જાગેલ વિવાદમાં કેન્દ્રીય સમાજના પ્રમુખશ્રી અબજીભાઈએ તો તેમનો 'સાચો- ખોટો' જવાબ આપી દીધો છે પણ હંસરાજભાઈ કે ગંગારામભાઈએ તેમનો ખુલાસો રજૂ ન કરતાં ખરેખર સતપંથીઓને થાબડભાણા કોણે કર્યા તે અંગે હવે શંકા ન રહેવી જોઈએ...
સમાજનું વાતાવરણ દૂષિત થઈ રહ્યું છે છતાં હંસરાજભાઈ અને ગંગારામભાઈ રામાણીને ખુલાસો કરવાની જરૂર જણાતી નથી તે આશ્ચર્યજનક અને આઘાતજનક છે ! તેમણે કરેલ કૃત્ય માટે જાહેર માફી માંગી લે તેમાં જ બધાની ભલાઈ છે... જ્ઞાતિના વ્યાપક હિતમાં શું તેઓ આટલું પણ નહીં કરે?
કોઈકે તો જવાબદારી લેવી જ પડશે ને? અબજીભાઈની સ્પષ્ટતા બાદ ખુલાસો કરવાની જવાબદારી વાંઢાય સંસ્થાનના મોવડીઓની છે. જો તેઓ ખુલાસો ન કરતા હોય તો અબજીભાઈએ તેમના પર દબાણ લાવવું જોઈએ અને જરૂરી ખુલાસો કરાવવો જ જોઈએ...બાકી, હવે આ લડાઈને તેના તાર્કિક અંત સુધી લઈ ગયા સિવાય છૂટકો નથી... સમાજના મોવડી કહેવાતા લોકો જ ઈરાદાપૂર્વક આવા ગફલા કરતા રહેશે તો વિધર્મીઓ સામેનું યુદ્ધ હજુ પણ પેઢીઓ સુધી ચાલતું જ રહેવાનું છે...
દર વખતે એપી સેન્ટર વાંઢાય જ કેમ?
'દાગી' સભ્યોને લેવાની વાત હોય કે સતપંથીઓ માટે વાંઢાયના મંદિરોમાં લાલ જાજમ પાથરવાની વાત હોય, દર વખતે એપી સેન્ટર વાંઢાયની સંસ્થાઓ જ કેમ હોય છે ?
પ્રમુખશ્રી અબજીભાઈની એવી કઈ મજબૂરી છે કે તેઓ આ બધી ભવાઈ જોયા કરે છે ? હાલના એપિસોડમાં બધા રીતસર ખૂલ્લા પડી ગયા છે...કોઈના 'વખાણ' કરવા જેવા નથી...સમાજની ત્રણેય સંસ્થાઓ સંકલનથી કામ કરે છે તેવી ડાહી ડાહી વાતો મીટિંગોમાં રજૂ કરવામાં આવે છે પણ જોયું ને ? સતપંથીઓને થાબડભાણા કરવામાં પણ સંકલનના નામે કેટલી મોટી રમત રમાઈ ગઈ છે ! જ્ઞાતિના સામાન્ય માણસની તો મતિ મૂંઝાઈ જાય તેવી હાલત છે...
સમાજની દરેક સંસ્થાઓમાં એટલી હદે સડો પેસી ગયો છે કે ન પૂછો વાત ! હવે તો લોકોને ડર લાગી રહ્યો છે કે, પોતાના સ્વાર્થ માટે આ પ્રકારના સત્તા લાલચુ લોકો ગમે તે હદે જઈ શકે છે...
લાકડાવાળાની સક્રિયતા ઘણાને 'ખૂંચી' રહી છે...
આ સમગ્ર કાંડમાં કેન્દ્રીય સમાજના ઉપપ્રમુખ જયંતિ લાકડાવાળાની સક્રિયતા લોકોને સ્પષ્ટ રીતે દેખાઈ આવી છે પણ કોઈ 'ભેદી' કારણસર તેમને એકલા પાડી દેવામાં આવ્યા છે! સમાજના સનાતની એજન્ડાને જો બુદ્ધિપૂર્વક આગળ ધપાવવવો હોય તો એકમાત્ર લાકડાવાળા જ આ કાર્ય સુપેરે કરી શકવા સમર્થ છે પણ અનેક કારણોસર તેમને નજરઅંદાજ કરવામાં આવી રહ્યા હોય એવું ચિત્ર ઉપસી રહ્યું છે. 'એક ઘા ને બે કટકા' જેવી કાર્યશૈલી માટે જાણીતા લાકડાવાળાને અંકુશમાં રહેવાની ફરજ પાડી કેટલાક લોકો આડકતરી રીતે મવાળ લોકોને જ મજબૂત કરી રહ્યા છે...
દોષિતોએ સમાજની જાહેર માફી માંગવી જ જોઈએ...
વાંઢાયની સંસ્થાઓમાં સતપંથીઓ માટે લાલ જાજમ પાથરવાનો નિર્ણય કોનો હતો તે હવે સ્પષ્ટ જાહેર થઈ ગયું હોવા છતાં આ કૃત્ય માટે જવાબદાર આગેવાનોએ હજુ સુધી જાહેર માફી માંગી નથી તે દુઃખદ છે. જવાબદારોની જાહેર માફી પછી જ આ કલંકિત એપિસોડ પૂરો થવો જોઈએ.
નવાઈની વાત તો એ છે કે કેન્દ્રીય સમાજના પ્રમુખ પણ આવા લોકોને છાવરી રહ્યા હોય એવું દેખાઈ રહ્યું છે ! આમાં સનાતની પ્રજાને હવે જાવું ક્યાં??
મવાળ લોકોની સામેલગીરીવાળી સંસ્થામાં હજુ પણ કેન્દ્રીય સમાજના આગેવાનો ચીટકીને બેઠા છે...
હજુ પણ મવાળ લોકોની સામેલગીરીવાળી વાંઢાયની સંસ્થાઓમાં કેન્દ્રીય સમાજના પ્રમુખ અબજીભાઈ સહિતના મહાનુભાવો હજુ પણ ચીટકીને બેઠા છે. તેમનામાં જરા સરખું પણ આત્મગૌરવ હોય તો તાત્કાલિક અસરથી તેવી સંસ્થામાંથી રાજીનામું આપી દેવું જોઈએ. કયા લોભ અને લાલચથી તેઓ ત્યાં બેઠા છે ? સમાજને આ જાણવાનો પૂરો હક્ક છે.
પ્રમુખશ્રી અબજીભાઈ તાત્કાલિક કડક નિર્ણય લઈ સમાજને વધુ નુકસાન થતું અટકાવી શકે છે. જેટલું મોડું થશે સમાજની વિશ્વસનીયતા સામે ગંભીર સંકટ ઉભું થઈ શકે છે...
|
|
.jpg){kind=tracking}
.jpg){kind=tracking}